هونەرمەندێ گەنج هەڤال ئیبراهیم دهەڤپەیڤینەكێدا دگەل (رووداو) دیاركر كو یەكەم ستران بناڤێ( ئەرێ دایێ) ل سالا 1999 تۆماركریە و ب وێ سترانێ ل دەڤەرا بەهدینان بەرنیاس بوو، بەلێ ب سترانا (وەرە قوربان) ل هەمی دەڤەرێن باشوورێ كوردستانێ هات نیاسین.
هەڤال ئیبراهیم، زۆر زوو خۆ نائێخیتە بەردەم پرسیار و هەڤپەیڤینێن رۆژنامەڤانا. پشتی چەند تێلەفونان رازیبوو ئەم هەڤپەیڤینەكێ دگەل وی بكەین، بەلێ هەر كو ئەم گەهشتین دەف وی هەڤالی ئێكسەر گۆت "خۆ هین وێنەێن من ناگرن، چونكە ئەز دناڤ كاریدا و یێ ب سەرو بەرم، ئەز دێ وێنەیەكی دەمە هەوە". بەلێ گۆت "هەر پرسیارەكا هەوە هەبیت كەرم كەن".
هەڤال دەرچۆیێ پەیمانگەها هونەرێن جوان 2003 ل دهۆكێ. ئەو دبێژی "من گەلەك حەز دكر باوەرنامەكا موسیقێ بینم، لەورا من پەیمانگەها هونەرێن جوان هەلبژارت، چونكە پەیمانگەه رێكا سەركەفتنا هونەری بۆ مرۆڤی ڤە دكەت".
لێ هەڤال نەدگەل هندێ دایە كو خوەندنا پەیمانگەهێ و ئەكادیمیبوونا هونەرمەندی مەرجە بۆ سەركەوتنا وی هونەرمەندێ سەركەفتی و گوت"چونكە گەلەك ژ مەزنترین هونەرمەندێن جیهانێ، نە دەرچۆیێن چ پەیمانگەهێن هونەرینە جوانن، بەلكو ب حەزكرن بووینە موزیكژەن و بەرنیاس بووینە". هەڤال زۆر حەز ل عودێ دكەت" ئەز حەش ئامیرێ عودێ دكەم".
هوزانڤانێ سەرەكی یێ هەڤال ئیبراهیمی بەدرخان سندییە، ئەو دبێژیت"هوزانێن بەدرخان سندی گەلەك كاتێكرنێ لمن دكەن، پەیڤێن هوزانێن وی دسادەنە، بەلێ ب بهانە".
بو دەستنیشانكرنا هۆزانا پرسیارا هەڤالێن خۆ دكەت، بەلێ ئەو بریارێ ل سەر ددەت و دبێژی" گەلەك بابەت هەنە ئەز دەست نیشان دكەم و دبێژمە هۆزانڤانی هۆزانەكێ لسەر ڤی بابەتی دروست بكە".
هندەك هۆزانێن هەڤالی كرینە ستران گەلەك كاتێكرن ل وی كریە و دبێژی"سترانا (تە ژبیرناكەم، من چ كریە) گەلەك كاتێكرن لمن كریە".
هەڤال گوهداریا زۆربەی سترانبێژا دكەت وان دكە "بتایبەتی سترانبێژێن كەڤن وەك تەحسین تەها، ئەردەوان زاخۆیی، ئەیاز و تاهر تۆفیق". هەروەسا دبێژی وی پەیوەندیێن وی دگەل هەموو هونەرمەندێن كوردستانی "د باشن"، هەروەها "من پەیوەندی دگەل هونەرمەندێن باكوورێ كودستانێ ژی هەنە".
ئەو دبێژی " هەمی هونەرمەندێن جیهانێ ل دەسپێكا خۆ هندەك سترانێن لاواز دبێژن". بەلێ ئەو ل گۆر وەختێ سترانێن خۆ "ئەز ل هەمی بەرهەمێن خوە یێ رازیمە".
گەلەك هونەرمەند دچنە توركیا بۆ چێكرنا ئەلبووم و كلیپێن خوە، لێ هەڤال ب گەشبینی ڤە بەحسێ پێشڤەچۆنا تەكنیكا كوردستانێ كر و دبێژی"تەكنیكا كوردستانێ ژی باش بوویە، بەرهەمێ (خوزی) من ل كوردستانێ دروستكر و، گەلەك سەركەفتن ئینا". ئەو نهاژی ل دهۆكێ مژوولی چێكرنا كلیپەكا تازەیە.
هەڤال دبێژی دەرئێخستانا یاسایەكێ بۆ پاراستنا مافێ هونەرمەندا و نەهێلانا كۆپیكرنێ كارێ حكومەتێ یە، لێ ئەو بەرۆڤاژی زۆر هونەرمەندێن كوردستانێ دبێژی " هاریكاری كرنا هونەرمەندا نە كارێ حكومەتێ یە، ئەو هونەرمەندێ نەشێت ب شیانێن خو یێن هونەری بژیت و بەرهەمان بۆ خو دروست بكەت، بلا هونەری بهێلیت".
هەڤالی گرێبەستەكە دگەل VIN TV هەیە، بەلێ ئەو رازی نەبوو بەحسا ناڤەرۆكا گرێبەستا خۆ دگەل وێ تەلەڤزیۆنێ بكەت . ئەو نها مژوولی نەشێم زێدەتر بەحسێ جورێ گرێبەستێ و خالێن گرێبەستێ بكەم.
دئەلبووما نوویا هەڤالی دا 4 ژ ستران ب زاراڤێ سۆرانی گۆتینە، ئەو دبێژی " ئەز گەلەك حەز دكەم سترانێت سۆرانێ بێژم و دڤێ بەرهەمێ نوی ئەوێ هاتییە بەلافكرن، چار ژوان سترانا سۆرانینە".
هەڤال دناڤ گەنجێن هەموو شارێن كوردستانێ دا حەزكریێن خوە هەنە، حەزكرنا وی ژی ل دهۆكێ تێدپەڕیت " ئەز گەلەك حەز ل شارێ هەولێرێ دكەم"، ژبەركو هەروەكو وی گۆت خەلكێ هەولێرێ گەلەك حەز ژ وی دكەن و "ئەز حەز دكەم ل هەولێرێ بژیم".
د ماوێ چەند خولەكاندا د وەختێ هەڤپەیڤینا مەدا 18 تێلەفون بۆ هەڤالی هاتن، ئەو دبێژی"من دوو هێلێن تیلەفونێ هەنە، ئێك یا من یاتایبەتە، یادی گەلەك خەلك دزانن، لەورا پرانیا وەختی ئەو هێلا خەلك دزانن یا داخراوە".
هەڤال رەخنە ژ رۆژنامەڤان و خەلكی دگری كو راستەوخۆ تێلەفونێ بۆ وی دكەن "مخابن هەتا نووكە خەلك چ ژ كاری نزانن، من رێڤەبەرێ كاروبارێن خو یێن هونەری هەیە، بەلێ هەركەسێ كارەك هەبیت حەز دكەت راستەوخۆ دگەل من ب ئاخڤیت، ئەرێ بۆچی ب رێكا رێڤەبەرێ كاروبارێت من نەبیت؟".
هەڤال ئیبراهیم، ب رێز و خۆشی بەرێ خوە ددەتە دیاردا وێنەگرتنا خەلكی دگەل هونەرمەند و كەسێن بەرنیاس "گەلەك كەیفا من دهێت دەمێ وێنا دگەل من دگرن، چونكە مرۆڤ چاوا دزانیت مروڤ بەرنیاس بویە، دەمێ خەلك وێنا دگەل مرۆڤی دگرن، گەنج و كچ گەلەك حەز دكەن وێنا دگەل من بگرن". بەلێ جارەكێ روودانەكێ دڤی چارچۆڤەیدا دلی وی ئێشاندەیە و ئەو ڤێ روودانێ بۆ (رووداو) ڤەدگێڕی و دبێژی "جارەكێ ل شەهیانەكێ كچەك هات دا وێنەكێ دگەل من بگریت، كەسوكارێن وێ لپێش چاڤێن من ئاخفتنێن نەخۆش گوتنێ و ل وێرێ بر، ئەڤە نەخوشترین مەوقف بوو ب سەرێ من هاتی".
هەڤال هێشتا خێزان دروستنەكرییە لێ ئەو دبێژی " ئەز ئەڤیندارم و بێ ئەڤینی نەشێم بژیم،سەركەفتنا ئەڤینێژی ئەوە مرۆڤ بگەهیتە مرادا خۆ".
رووداو